|
|
Trokaolatarrak - gilkitxaro antzerki taldea - 2001
TROKAOLATARRAK Gilkitxarok sortu duen laugarren antzezlana da. Aligiri-Otumetxu baserrian ama alaba diren hiru emakume alargun bizi dira, Trokaolatarrak. Etxean bizi ziren gizonezkoen heriotza misteriotsuak gertatu baziren ere, herrian ez dituzte erruduntzat hartzen, bai, aldiz, pekataritzat. Nola liteke gizonezko barik hiru emakumek baserria aurrera ateratzea?
Margaritak, Fundación de las Margaritas erakundeko emakume aberatsak, Aita Domekaren, herriko apaizaren, zerbitzuaz eta laguntzaz baliatuta, Trokaolatarrak bideratu nahi izango ditu, beti ere Don Claudio Sánchez de Albornoz, herriko jabearen babespean.
Baserriko txerriak bizirik eta gero eta lodiago dauden bitartean, Aligiri-Otumetxu baserrian txarriboden ospakizunek aurrera jarraitzen dute. Txarriak izango dira, hain zuzen ere, komedia honen gidariak. Animalien ohiturak galtzen doazen heinean, txerriak pertsonen bizioak ikasten joango dira. Menpekotasuna, familia, boterea eta zintzotasuna bezalako baloreak kolokan jarriko dira obran zehar.
testuari buruz
Atzoko euskal teatroak baserria eta herri xehearekin lotura sendoa zuen. Erlijioak aurreko gizartean zuen pisuaren erakusle zen antzerkia ere. Ohiturak, tradizioak eta batez ere, eragin handia zuten, siniskeriak etengabeak dira TROKAOLATARRAK antzezlanean.
Gaur egungo gizarteak nekazal eta baserri giroan bere burua islatuta ikusten ez badu ere, oraingo bizimoduak dituen osagai asko agertuko da antzezlanean: boterea lortzeko lehia, dirua eskuratzeko garra; kontrol iraunkorra azken finean. Edo hobe esanda, kontrola galtzearen beldur etengabea. Kontrola edukitzeak berez dakar domeinua eta agintea hondoratzearen egonezina. Gezurra eta faltsukeriaren laguna den inposaketan ondorioztatzen da beldur hori. Hori da gizakiari datxekion justizia bidegabeenaren bilaketa. Bakoitzaren justizia, norberarena, bakarrean bihurtzeko arriskutan dagoen zuzenbidea da. Norberekerian kaosa kolektibitatearen, taldearen, irudiaren atzean estaltzen da, familian, herrian edota edozein estamentutan. Itzelezko zorigaitza estaltzen duten beste komeria askotan bezala umorea da gure inguruari eraso egiteko aukeratu dugun arma.
TROKAOLATARRAK antzezlanean agertuko diren ohitura eta tradizioari buruzko erreferentziak Azkueren ikerketetan oinarrituta daude batez ere. Bestalde Gabriel Arestiren antzerki lanak gogoratuz, eta omenduz, bere teatroaren aipuak izan badaude. Horretaz gain ezagunak ere diren Mogelen Peru Abarkaren gisako pertsonaiak, edota ezagunak ez diren gure inguruko arbasoen presentzia aurki daiteke TROKAOLATARRAK osatzen duten pertsonaien atzean. Fredi Paia bertsolariak, gainera, antzezlanarentzat beren beregi bertso sorta bat prestatu du. Musika ezberdinek, euskal tradizionalak zein elektronikoak, girotzen dute obra.
Agerraldi bakar batean gertatzen den baserri komedia da TROKAOLATARRAK. Bederatzi pertsonaien arteko harremanak eta gora beherak dira agertuko direnak. Istorio honetako protagonistak eta aurretik zegoen mundu orok obraren sarean eroriko dira. Guztira hamabost eszena arinek kaosean bukatu behar duen tentsioa areagotuko dute.
Galder Perez 2001eko urtarrilean
pertsonaiak
TXARRIA .................................. Ane Zabala Gabikagogeaskoa
TXARRIA .............................................................. Eider Olaziregi
TROKAOLATAR JUANA BIXENTA ................. Amaia Escudero
TROKAOLATAR FRANTZiSKA ........................... Ane Rotaetxe
TROKAOLATAR INAXIA ................................ Maider Amezaga
MARGARITA ............................................... Mentxu Amunategi
AITA DOMEKA ...................................................... Galder Perez
KARLOS ................................................................. Jonan Lekue
fitxa teknikoa
Ideia ...........................................................................GILKITXARO
Testua .......................................................................... Galder Perez
Bertsoak ...........................................................................Fredi Paia
Eszena zuzendaritza ..................................... Mentxu Amunategi
Txarrien diseinua ..................................................... Aidi Delgado
Irudiak ................................................................ Maider Amezaga
Argazkiak ............................................................. Ziortza Morales
Off ahotsa ........................................................... Iratxe Fresneda
GARRAIOA ............................................................. Txarli & Bittor
TXiSPAS ................................................Harkaitz Diaz Letamendi
trokaolatarrek eginiko agerraldiak
2001
Maiatzak 11 DEUSTUKO GAZTE LOKALA
Maiatzak 27 DEBAKO XV. ANTZERKI ASTEA
Ekainak 2 GASTEIZKO GAZTETXEA
Ekaianak 14 KALDERAPEKO (Bilbo)
Ekainak 23 TXOMIN ETXEA (Donosti)
Urriak 5 - MENDARO
Urriak 20 - DURANGO, SAPUETXE GAZTETXEAN
Azaroak 11 - BERA, Zizka ostatuan
Azaroak 18 - MUTRIKUKO EDERRENA ZINEMA
Azaroak 30 - BILBO, San Inaxioko Intxixu ikastolan
Abenduak 2 igandea - ATXONDOKO GAZTETXEAN
2002
Otsailak 9, LEIOA (Gaztetxean)
Martxoak 25, BILBOKO KAFE ANTZOKIAN
Apirilak 13, ZAMUDIO (Gazte eguna)
Apirilak 18, LIZARRAN (musika eskolan)
Apirilak 19, BILBO (Urretxindorra Ikastola)
Apirilak 21, ZIBURU (Tana Tabernan)
Maiatzak 10, ETXEBARRI (Kultur etxean)
Maiatzak 24, BERGARA (Gaztetxean 21.00etan)
LAGUNTZAILEAK
Deustuko Gazte Asanblada
Blokin etxea
 |